هند صبري : كنت عشوائية فى طفولتى ولم أتوقع أن أخوض تجربة الإنتاج مع نتفلكس

كشفت هند صبري خلال لقائها مع نتفليكس عن كواليس مسلسلها الأخير البحث عن علا، والذي حقق نجاحا كبيرا، وحظي بتفاعل كبير من الجمهور، وجاء على رأس قائمة الأعمال الأعلى مشاهدة على نتفليكس في مصر والوطن العربي، وخاضت هند من خلاله تجربتها الأولي في الإنتاج.

وقالت هند خلال اللقاء : مريت بنفس طفولة علا، يعني بحس نفسي عارفاها من جوه وبره، وبحس إنها جويا، وبخرجها أوقات .. يعني علا هي أنا بشكل ما، هي صورة كاريكاتورية مني.

وأضافت : أنا كنت عشوائية زي علا في طفولتي، ولسه عشوائية كمان، بس إتعلمت أداري، علا شبهي جدا، يعني الفستان اللي كان بيضايق علا وهي صغيرة علشان حلو أوي وعاجب مامتها، دي قصة حقيقية وأنا عيشتها، علشان كدا علا جزء مني.

وتابعت هند : قبل ما أدخل تجربة الإنتاج عملت بحث كتير جدا، دخلت موقع ماستر كلاس وشوفت الماستر كلاس لشوندا رايمز علشان هي أقوي صانعة مسلسلات في أمريكا، وماكنتش متأكدة، كنت محتاجة أثق في نفسي أكتر، وإتعلمت أسمع كلام اللي حواليا، أنا شخصية مابتعملش ومابتسمعش غير اللي في دماغها، كنت بتعلم أسمع واأقتنع، اتعلمت كتير وماكنتش أتوقع إني أخوض تجربة الإنتاج مع نتلفيكس.

واختتمت كلامها : أخر يوم تصوير للمسلسل أنا حسيت حاجات محستهاش بعد 26 سنة تمثيل، حاجات كتير وملخبطة .. ومش عارفة هقدر أرجع ممثلة بس ولا لا.

البحث عن علا بطولة هند صبري، سوسن بدر، هاني عادل، ندى موسى، محمود الليثي، داليا شوقي، إضافة إلى عدد من ضيوف الشرف، على رأسهم خالد النبوى، دينا، فتحى عبدالوهاب،  يسرا، وشيرين رضا، وهو من تأليف غادة عبدالعال وقصة وسيناريو وحوار مها الوزير وغادة عبدالعال، وإخراج هادي الباجوري.