محمود العسيلي : مشواري لسه بيبتدي وبحب المهرجانات وبدأت الغناء وأنا في تانية جامعة
كشف محمود العسيلي عن تفاصيل جديدة في حياته الشخصية، وبداية شهرته ودخوله مجال الفن، وكذلك رأيه في أغاني المهرجانات، وذلك من خلال تصريحات تليفزيونية.
وقال محمود العسيلي : قدمت أول أغنية وأنا في تانية جامعة، وكانت أغنية مجنونة، والجمهور عرفني بعدها، ولما كنت بركب التاكسي وبعدي من قدام مدارس البنات يشوفوني يصرخوا ويجروا عليا، وبعدها حياتي اتغيرت، وبقيت أتعامل إني مشهور.
وأضاف : مع كل أغنية بعملها بعتبر كإنها أول عمل لسه بعمله، وفي وقت حسيت بالغرور وشوفت نفسي وقلت الله ده أنا جامد أوي روحت واخد على قفايا ودي كانت رسالة من ربنا إني أفوق لنفسي لإني معملتش لسه حاجة، واتعلمت إن عمري ما أبقى راضي عن مشروعي الفني أبدًا ولا أضمن النجاح ولا أعمل حاجة وأتوقع إنها تكسر الدنيا وإن كل حاجة بإيد ربنا.
وتابع : بعتبر نفسي لسه ببتدي، وهرضى بمشواري الفني لما أوصل للعالمية وأعمل حاجة مختلفة وأقف على مسرح عالمي بأوركسترا كامل.
وقال : مكنتش أتخيل إني هبقى مشهور، وكنت حاطط قدامي هدف أشتغل في الإعلانات، والتمثيل كانت تجربة مش حلم، ولو اتعرض عليا عمل فني أمثل فيه معنديش مشكلة أشارك تاني، لأن شخصيتي اختلفت عن الأول.
رأيه في أغاني المهرجانات
وعن رأيه في المهرجانات قال محمود العسيلي : أول بداياتي كانت بلون فني مختلف، وبحب المهرجانات والراب مش بهاجم أصحابها، وابني بيسمعها وكل طبقات الشعب كمان، ولكن أي فن محتاج تجديد عشان يعيش، والمهرجانات فن مصري أصيل مأخوذ من شارعنا المصري.
آخر أعماله
من ناحية أخرى تعد أغنية عيني شايفة فيكي هي احدث أعمال محمود العسيلي، وقد حققت نجاحًا ملحوظًا، والأغنية من كلمات تامر حسين، ألحان محمود العسيلي، توزيع أمين نبيل، وهي بالذكاء الاصطناعي، ومن كلماتها : جايبه الجمال ده منين مين اللي شافه قبلي مجاش في بني آدمين أكيد عشان متساب لي بعيونك الحلوين ده يترسملك صورة بحر و طبيعة وناس قدام عنيكي مبهورة عيني شايفة فيكي كل مزايا الدنيا بحالها والحاجة اللي انتي تبصيلها تحلى في عيني ياعيني عليكي ياعيني عيني.
وسبق وفي العام الماضي 2023، عاش العسيلي انتعاشة فنية، حيث طرح 8 أغاني، هم مين كان يصدق، والتي سجلت أكثر من 3 ملايين مشاهدة، على موقع الفيديوهات يوتيوب، سمع هس، في شهر 6، كده كده بايظة،اوعى، الكل عليك بينم، طول ما إحنا مع بعض، سلامات حبيبتي.
