آمال ماهر : قلق الناس على شائعة اختطافي فرحني وطلعوا عليا إني اتجوزت
حلت آمال ماهر ضيفة على برنامج الحكاية، الذي يقدمه الإعلامي عمرو أديب على قناة mbc مصر، وكشفت عن حقيقة عدد من الشائعات التي طالتها خلال الفترة الماضية.
وقالت آمال ماهر : لو هتكلم عن قلق الناس عليا وقت شائعة اختطافي دي حاجة فرحتني مش ضايقتني، لأن ده دليل على محبة الناس، بس أنا بطمنهم وطمنتهم وبطمنهم تاني أنا بخير، ودي مجرد إشاعات، زي إشاعات كتير بتحصل في الوسط وفي ناس بترد سريعًا، وناس تانية بتقول اللي يقول يقول.
أسباب الغياب
وتابعت : للأسف تعبي هو السبب في تأجيل إني أطلع أقول للناس أنا كويسة، وطلع عليا إشاعات كتير زي إني اتجوزت، ومخطوفة وطلع عليا إني بتعذب، ووالدتي خافت عليا، وقرايبي قالولي ابعتلنا صوتك عشان نطمن عليكي يا إما هنجيلك.
وأضافت : كنت مخضوضة، وكنت بشرح للناس اللي مش عارفاهم إني كويسة، وكانوا بيكلموا ابني يسألوه يطمنوا، وكان بيتنرفز.
وتحدثت آمال عن أعمالها المقبلة، وقالت : مفيش أعمال جديدة حاليًا، دي مش فترة أغاني، ومش هشارك بتترات في رمضان، ولكن بجهز لمفاجأة بعد رمضان ولسه هنزل الجزء التاني من الألبوم.
من ناحية أخرى تصدرت آمال ماهر، تريند مواقع التواصل الاجتماعي، خلال الفترة الماضية، عقب إعلان إلغاء حفلها ليلة رأس السنة بشكل مفاجئ، حيث حذفت بوستر حفلها الجديد في رأس السنة معلنة إلغاءه، وكان من المقرر أن تعود آمال ماهر لحفلات اللايف في موسم رأس السنة 2024 وذلك يوم الجمعة الموافق 29 ديسمبر الماضي، بحفل غنائي تقدم خلاله باقة من أجمل أغانيها.
آخر أعمالها
وتعد أغنية كسبتوا الرهان، التي طرحتها ضمن أغاني ألبومها الجديد أنا كويسة، عبر قناتها الرسمية على موقع الفيديوهات العالمي يوتيوب، هي آخر أعمال آمال ماهر الغنائية.
وتقول كلمات الأغنية : كان لسه بيقول من يومين أنا مش هسيبِك كان لسه كاتب ورقة وبإمضة حبيبِك .. فجأة الحياة قلبت وبان وشه الحقيقي واتغيرت لهجة مشاعره لقيت شيطان أتاريه رهان.. راهن عليا وقاللهم مش دي القوية هخليهالكم تبقى خاتم بين إيديا مبروك عليك وعليهم المطلوب حصل دلوقتي أضعف واحدة أنا في الدنيا ديه كسبتوا الرهان .. بقعد وافكر في اللي حاصل وفي حقيقته ازاي ده كان بارع كده ومتقن طريقته وبقيت معاه متغيره ومستسلمه وصحيت لقيتني لوحدي بين أربع حيطان .. أتاريه رهان.
