يوسف معاطي : عادل إمام كان هيعمل دور خالد زكي في طباخ الريس
كشف الكاتب والسيناريست يوسف معاطي، خلال حلقته مع الإعلامي عمرو الليثي في برنامج واحد من الناس، عن كواليس فيلم طباخ الريس، مؤكدًا أن الزعيم عادل إمام كان مرشحًا في البداية لتجسيد دور الريس الذي قدمه خالد زكي.
كواليس فيلم طباخ الريس
وقال معاطي : الفكرة بدأت لما كنت قاعد في مكان بالمهندسين وقابلت راجل لطيف واكتشفت إنه طباخ الرئيس مبارك، وقعدت أتكلم معاه أكتر من مرة، ومن هنا طلعت بفكرة الفيلم، وكان فيه عدم قبول من الرقابة في البداية.
وأضاف : الرئيس مبارك أكتر حد حب الفيلم، وكان بيحب مشهد وديت الشعب فين يا حازم، وده بيتدرس في جامعة بإيطاليا لحد النهاردة، وبقا ريفرنس.
وتابع : عادل إمام كان هيعمل دور خالد زكي في الفيلم، ووقتها أنا قولت له لأ لأن بطل الفيلم كان الطباخ، ووقتها كنت شايف إن خالد زكي أنسب واحد يعمل الدور، وهو ممثل جاد.
كما تحدث معاطي عن أحد المشاهد التي أثارت اندهاش مبارك، قائلاً : كان فيه مشهد بيتكلم فيه عن الثروة الحيوانية، وقال جملة : البهيمة الغريبة لما تروح مكان جديد مبتكلش أول يومين، ومبارك سألني: إنت عرفت المعلومة دي منين؟! لأنها فعلاً بتحصل على أرض الواقع.
حديث يوسف معاطي عن الزعيم
وفي وقت سابق، كشف يوسف معاطي عن كواليس علاقته بالزعيم عادل إمام، وسبب عدم كتابة قصة حياته، قائلًا : الزعيم عادل إمام طلب مني أكتب قصة حياته، لكني رفضت، لأني شايف إن قصة حياته لازم تتكتب كعمل أدبي كبير، زي ما اتكتبت قصة حياة شارلي شابلن.
وتابع : عادل إمام علم كبير ومش أقل من شارلي شابلن، وقصة حياته تستحق تتعمل بالشكل ده، ولازم أسرته كمان تكون عندها الرغبة إن حياته تتحول لعمل أدبي، وساعتها شايف إن أنسب واحد يجسد دوره هو ابنه محمد.
كما تحدث عن تجربته مع الزعيم في الدراما التلفزيونية، قائلًا : محدش خد باله إن عادل إمام كان عازف عن الدراما لمدة 45 سنة من بعد أعماله زي أحلام الفتى الطائر ودموع في عيون وقحة، وأنا فضلت أدور على طريقة يرجع بيها للدراما، لحد ما عملنا مع بعض العراف، واللي بعتبره أقرب مسلسل ليا معاه.
