المنتج محمد رشيدي يرد على جدل إيرادات الأفلام
طالب المنتج محمد رشيدي بوضع نظام صارم وشفاف لإيرادات السينما المصرية، متهما من وصفهم بـ كبار الشغلانة بتزوير أرقام شباك التذاكر ومحاربة شركته الإنتاجية وترهيب الممثلين الذين يعملون معه للسيطرة على السوق.
أزمة إيرادات السينما المصرية
أوضح المنتج محمد رشيدي أنه تعرض لضغوط غير مسبوقة ومحاولات لتعطيل أعماله، مشيرا إلى أن البعض استغل نفوذه لإقناع الفنانين بعدم التعاون معه، حيث قال عبر منشور على صفحته الرسمية بموقع فيسبوك: على مدار الأسابيع اللي فاتت التزمت الصمت في أكثر موضوع أنا كنت بحاربه، وهو الإيرادات، وكنت أول واحد اتكلمت على إنه لازم وجود سيستم للإيرادات، واتهموني كثير قوي إني بفتعل مشاكل وصدامي وببوظ الصناعة، وهري كثير قوي.
وتابع: لدرجة إني بدأت أتحارب في شغلي من ناس سموا نفسهم كبار الشغلانة، وأنا مع كامل احترامي الشديد ليهم شايفهم كبار فعلا، بس في السن! والناس دي وصلت إنها تكلم كل ممثل هيشتغل معايا قبل ما يصور، يحاولوا يقنعوه ويخوفوه إنه لو اشتغل معايا هيدمروا إيراداته، وإنهم هم المتحكمين في الإيرادات والرزق (أستغفر الله العظيم).
تزوير الإيرادات
وأشاد المنتج بموقف النجوم الذين رفضوا الانسحاب واستمروا في تصوير أعمالهم، مؤكدا أن ما يحدث في السوق من تزييف للأرقام لن يمر مرور الكرام، مستطردا: وحق الله كل الممثلين طلعوا رجالة وصوروا، ولا ركزوا في الكلام الفاضي ده، وكان رد الله أقوى بكثير قوي، فينزلوا بفيلمين قصاد بعض والفيلمين يتزور إيراداتهم، لأنهم ببساطة مش هينفع أبدا يعترفوا إنه مش بإيديهم، وده اللي صوتي اتنبح وبقوله من أول يوم في الشغلانة دي.
وتابع: عايز أكد حاجتين مهمين جدا؛ إن الممثلين ملهمش أي ذنب في أي إيرادات وصلتلهم غلط، والأهم إني للأسف حاولت كثير أسكت، ولكن زي ما أنتم عارفين الطبع يغلب التطبع، وأنا مبعرفش أسكت عن الحق خصوصا لما الكذب بيزيد مبستحملش.
الحقيقة ورسالة قوية لصناع السينما
واختتم محمد رشيدي حديثه بتوجيه رسالة شديدة اللهجة لصناع السينما، مشددا على تحمله المسؤولية الكاملة عن صحة الأرقام التي ينشرها قائلا: دى الإيرادات الأصلية المضبوطة، وأي حاجة غير كده هري وعلى مسؤوليتي الشخصية، ولو في فروق هتبقى فروق تافهة جدا لا تذكر.
وتابع: واللي عايز يفوق وضميره يصحى بما يرضي الله ربنا يجازيه خير، واللي غروره ومرضه النفسي هيفضل سايقه ربنا يهديه ويشفيه، ورجاء أخير بكل ود واحترام، اتقوا الله، وكل واحد يبص في ورقته، والرزق بإيد ربنا فقط، ومحدش يدعي الألوهية على الأرض.
