جنات تتحدث لـ خبر أبيض عن التمثيل وسبب غيابها والمطرب الذى تتمنى مشاركته فى ديو جديد
طرحت جنات ألبومها الجديد ألوم على مين، منذ أيام قليلة، وكشفت لكاميرا خبر أبيض عن تفاصيل الألبوم، وسبب اختيار موعد طرحه في الصيف الحالي وسط هذه المنافسة الكبيرة للنجوم الكبار، وسبب عدم خوضها تجربة التمثيل حتى الآن، وعدد آخر من الأسرار.
وتحدثت جنات عن سبب اختيار موعد طرح ألبومها الجديد، وقالت : أنا مقررتش أطرح ألبومي وسط الزحمة، والفكرة جاتيلي قبل ماعرف مين هينزل ألبوم، لكن جاتلي حالة سعادة كبيرة جداً بسبب الرواج الموجود دلوقتي، وإحنا كنا كده زمان، وكل الناس كانت بتنجح.
وتابعت : ولما كان السوق بيكون فيه حاجات كتير الجمهور بيتابع ومنتظر، والحاجات دي كنا مفتقدينها دلوقتي، والحمد لله بدأنا نرجع تاني زي زمان.
وعن غيابها الفترة الماضية، تابعت : أنا غبت الفترة اللي فاتت فترة طويلة بسبب ظروف عائلية وجالي بنتين وكانوا صغيرين محتاجين مجهود، وكانوا واخدين كل وقتي ومكنتش بعرف أعمل أي حاجة لا بسافر ولا بخرج زي أي أم، لكن لما كبروا بقى عندي حرية أكتر.
وعن المطربين الذي تتمنى تقديم ديو معه ، قالت : ناس كتير طبعاً زي عمرو دياب، بهاء سلطان، وسمعت كل الألبومات اللي نزلت السنة دي، وكلهم حلوين رامي جمال، ورامي صبري وأصالة وآمال ماهر، وطبعاً عمرو دياب وحمزة نمرة وأحمد سعد.
شاهد الفيديو …
وعن اللحن الذي تحب تقديمه، أضافت : بحب أقدم اللحن الحلو، ومعنديش مشكلة أقدم شعبي أو مهرجانات المهم تكون الجملة حلوة وتليق عليا، وعن عدم خوضها تجربة التمثيل حتى الآن، تابعت : مفيش حاجة متكاملة جاتلي، دايماً لما بيتعرض عليا حاجة بتكون ناقصة، سواء إنتاج أو سيناريو، لكن أنا مستعدة ومنتظرة فرصة حلوة.
تفاصيل ألبوم جنات
ويتضمن ألبوم ألوم على مين لـ جنات 9 أغنيات باللهجة المصرية، وأغنية واحدة فقط باللهجة المغربية، تؤديها جنات كـ ديو مع المطرب المغربي زكريا الغافولي، في خطوة اعتبرها البعض تحية لجذورها ولجمهورها المغربي.
ويحمل الألبوم مزيجا متنوعا بين الطابع الدرامي والمقسوم، ويعكس رؤية موسيقية ناضجة بالتعاون مع نخبة من الشعراء والملحنين، لتقدم جنات من خلاله تجربة فنية تعكس نضجها واستمرار شغفها بالموسيقى.
وكشفت جنات لـ خبر أبيض من قبل عن سبب قرار طرح الألبوم دفعة واحدة وقالت : الألبوم عندي من زمان، وكل ما كنت بنزل أغاني سينجل كنت بحس إني مش مبسوطة ومش هو ده، حتى الناس تفاعلهم كان أقل.
