حسام حبيب : شيرين حاولت الانتحار في المستشفى ومعنديش أي مصلحة في موتها
تعيش شيرين عبدالوهاب في الفترة الحالية، أزمة كبيرة خاصة بعد إعلان شقيقها محمد عبدالوهاب، في مداخلة هاتفيه مع برنامج الحكاية الذي يقدمه عمرو أديب، منذ أيام عن أسباب دخولها المستشفى، وقال : شيرين بتتعاطى مخدرات مع حسام حبيب في شقة بالتجمع، وأمي طلبت مني أنقذها.
وخرج حسام حبيب عن صمته، منذ قليل، عبر اتصال هاتفي مع برنامج الحكاية الذي يقدمه عمرو أديب، وقال : أنا لم أرتكب أي شئ في حق شيرين، وقولت لها إنتي ممكن تصدقي إني ممكن أضرك؟، وأنا بدعيلها على طول في الفترة الحالية وأتمنى أن تتجاوز هذه الأزمة، ولما عرفت بموضوع إدمانها قولتلها يا أنا يا المخدرات، وعرفت إنها حاولت تنتحر في المستشفى الأيام اللي فاتت.
وتابع : كل حاجة شيرين قالتها غلط، وكلامها كله كان كيد منها لأنها مش قادرة تخرج من العلاقة، وآخر مرة اتكلمنا قالتلي احنا مش هنقدر نرجع لبعض تاني، وكنا عاملين شركة أنا وهي بنشتري أغاني وننتجها، ومشتغلتش طول الفترة اللي فاتت دي علشان شيرين عندها عصابة حواليها، وجالها محاسب قالها أنا مش معايا فلوس ادتله ١٠٠ ألف دولار.
وأضاف : أنا مخي مشلول في الفترة الحالية والموضوع كبر قوي، وحاليًا بحاول أرضي ربنا، وبقالي فترة أنا وشيرين بنتكلم عن الوضع ده، ومعنديش أي مصلحة في موتها، ولكن هناك شخص في دائرة شيرين عبدالوهاب قالي أنا معايا توكيل رسمي منها وهحجر عليها.
وأكمل : اللي بيدمر شيرين هو اللي عاوز يحجر عليها. وعمري ما أخدت من شيرين جنيه، وواجبي أكبر فلوسها مش آخد منها، وتنازلت عن عربيتي ليها، وعن سبب أزمته معها قال : أوضة نومنا كانت زي محطة مصر، أي حد كان بيفتح ويدخل علينا.
