رئيس مجلس الإدارة
أحمد عصام فهمي
رئيس التحربر
عبدالحميد العش

كل النجوم صوت وصورة

حلا شيحة تفجر مفاجأة : تامر حسنى لم يحترم رغبتى والفن لو بيخلينا نبعد عن منهج ربنا ميبقاش فن

غموض كبير أحاط بموقف حلا شيحة من الرجوع إلى الفن طوال الأشهر الماضية، خاصة مع غيابها تمامًا عن أية فعاليات تخص فيلمها الجديد مش أنا، والذي شاركت فيه أمام تامر حسني، غير إن حلا ألمحت لاعتزالها الفن بعدما نشرت منذ فترة وقالت فيما يخص الفيلم : أنا حاليًا مش أنا، إلا إنها لم تفصح بشكل مباشر عن اعتزالها.



 

لكن حلا شيحة فاجأت الجمهور صباح اليوم بتوجيه رسالة عتاب قاسي إلى تامر حسني من خلال حسابها على موقع إنستجرام حيث كتبت : أنا اتفاجئت جدًا بنزول كليب يجمع فيه مشاهد متفرقة من الفيلم، وفي أيام ذي الحجة، أيام مباركة وخصوصًا بعد آخر بوست نزلته ووضحت فيه أنا إيه، واتفاجئت أكتر خصوصًا بعد وعد تامر حسني ليا وتأكيده إنه حيحترم رغبتي و بعض الطلبات اللي طلبتها منه بكل احترام وود الصيف اللي فات وأكد لي إنه حيحترم رغبتي.

 

واستكملت : إحنا يمكن نجحنا بمقايس الدنيا بس صدقوني بمقايس ربنا إحنا لم ولن ننجح، أنا عارفة ومتاكدة إن زملائي جواهم خير بس للأسف فتنة الشهرة والنجاح مش بتخلينا نشوف ونقيس الامور صح.

 

وأضافت : بتكلم من قلبي الكليب ده ميرضيش ربنا وأنا عيطت لأني شفت نفسي في المشاهد دي .. دي كانت زلة نتيجة ظروف مريت بيها وكلنا بنغلط و لازم نغلط علشان إحنا بشر بس المصيبة إننا بنغفل وبننسى .. أنا مش حتكسف من حد أنا تبت من المشاهد دي و هي لا تصح و أنا غلطت و بصلح وأهم حاجة إن ربنا يرضى عني لأن في الآخر ده اللي حينفعنا مش الشهرة ولا النجاح.

 

وتابعت : الفن لو بيخلينا نبعد عن منهج ربنا ومنبقاش قدوة لولادنا يبقي باطل وميبقاش فن، إحنا كلنا عندنا امتحان في الدنيا دي وحابة افكرك بالفيديو ده يا تامر اللي قولت فيه انا مش بتمنى أموت وأنا مطرب أنا دايما خايف من كدة .. كلام أكيد قولته في لحظة صدق جواك و جوانا كلنا.

 

واختتمت : يا سلام لو أصواتنا ومواهبنا كلها نستعملها في الخير عشان يبقى فن بجد.

 

 

وأثارت رسالة حلا شيحة موجة من التعاطف معها، كما تسببت في جدل كبير خاصة مع حديثها عن وعد تامر حسني لها، والذي لم يُبدِ أي رد فعل على رسالة حلا حتى الآن.