خواطر مجزية.. ورا كل وش… حكاية
عمرك بصيت في وش حد معدّي جنبك، وسألت نفسك: يا ترى حكايته إيه؟
في الزحمة، بنشوف وشوش كتير… في الشارع، في الشغل، في المواصلات.. بنعدّي جنب أصحابها كأنهم مش موجودين، ويمكن ما نعرفش إن كل وش فيهم شايل عالم كامل.
فيه حد بيضحك، ويمكن الضحكة دي ساترة دمعة.. وحد مستني رسالة أو رجوع غايب.. وحد تاني بيتمنى يمشي من مكان بقى أضيق من احتماله.. فيه اللي بيبدأ من جديد بشجاعة، وفيه اللي لسه واقف عند لحظة فاتت من سنين، كل ما حاول يعدّي منها رجع لها قلبه.
حكايات الناس مش دايمًا شبه اللي باين عليهم ممكن تفتكر إنك عرفت حد من ملامحه، أو من طريقته في الكلام، لكن الحقيقة إن كل إنسان جواه تفاصيل ما بتحكيهاش النظرة الأولى.
تخيّل لو كل واحد فينا وقف لحظة وحكى… كام حكاية كنا هنسمع؟ كام حياة كنا هنعيش؟ كام رواية كانت ممكن تتكتب، وكام فيلم كان ممكن يخلّي الناس تشوف العالم بعين غير عينها؟
من شارع صغير لمدينة على البحر، ومن المحيط للخليج، تتبدل الوجوه وتتغير الأماكن… لكن يفضل بيننا شيء واحد مشترك: الحكاية.
يمكن تختلف بداياتنا، ويمكن تتباعد طرقنا، لكن الفرح والخوف والانتظار والفقد والأمل… مشاعر بتجمعنا مهما اختلفت لهجاتنا.
علشان كده، ما تستعجلش في الحكم على حد، وما تفتكرش إنك عرفت حكايته من أول مشهد.. يمكن كلمة طيبة منك تفتح له بابًا كان مقفول، ويمكن سماعك له يكون أول مرة يحس فيها إن حكايته مهمة.
ورا كل وش حكاية…
وكل حكاية تستاهل إن حد يسمعها.
حكايات علي الرف .. كنوز مستنية تتشاف.





