رئيس مجلس الإدارة
أحمد عصام فهمي
رئيس التحرير
محمود الضبع
كل النجوم صوت وصورة
رئيس التحرير التنفيذي
إلهامي سمير
facebook twitter youtube instagram tiktok

إلهامي سمير يكتب عن: المهرجان وكشري أبو طارق والكلبة عسلية

إلهامي سمير
إلهامي سمير

عادة ما كان انتظار الفاعليات الفنية الكبرى بمثابة يوم العيد الذي تنتظر شروق شمسه على أحر من الجمر، وأنت ممسك بالهدوم الجديدة والجزمة اللى بتلمع فى انتظار أن يهل هلال العيد.

منذ أيام هل هلال مهرجان القاهرة السينمائي وكالعادة بدأت أخبار المهرجان تخطف الأضواء والعيون والاهتمام منذ اللحظة التى مشى فيها أول فنان على الريد كاربت، فقد جرت العادة مؤخرا على أن يكون للريد كاربت نصيب الأسد فى أي حدث فني، تشوف مين اللي جه ومين اللي طنش، مين اللي جات ببطانة ومين نسيتها، مين اللي التزم بالدريس كود ومين قال ماليش دعوة.

وفجأة وبينما يا مؤمن نحن نبحث عن أخبار الأفلام والماستر كلاس والندوات والمحاضرات والورش وغيرها وغيرها من الأحداث المهمة فى أي مهرجان والتى تفرد لها صفحات وتخصص لها القنوات برامج ولقاءات ومناظرات، وجدنا الأخبار المنتشرة والجدل الدائر محصور فى حاجتين فقط لا غير كشري أبو طارق والكلبة عسلية.

تخيل سيبنا المهرجان بكل اللي فيه وركزنا على الكلبة، وهل كان ينفع تبقى موجودة على الريد كاربت هى وأصحابها اللي حسوا بالأمان فبقوا يجيوا يوميا يتمختروا على الريد كاربت وياخدوا كام صورة هنا وهناك من غير ما يعرفوا أنهم حاجزين مكانهم يوماتي فى التريند، ولا كان المفروض أننا نمنع عسلية واللي معاها من أنهم يمشوا على الريد كاربت علشان شكلنا وسمعتنا قدام الناس، وعلشان محدش يقول عننا حاجة؟ 

سيبنا المهرجان وركزنا فى كشري أبو طارق وهل يصح يبقى موجود بالدقة والورد والشطة زيت فى مهرجان عريق زي ده، ولا نسيبه موجود وأهو جزء من ثقافتنا وبيئتنا وأهي فرصة الأجانب يتعرفوا على أكلنا؟

سيبنا المهرجان ومسكنا فى رقص حسين فهمي بالعصايا، وهل ينفع ولا لأ؟

سيبنا المهرجان وركزنا فى اللقطات، والفساتين واللوكات والريد كاربت، واللي راح مع مراته واللي راح من غير مراته، واللي مشي على الريد كاربت ومحدش عارفه، والمعروف اللي كان المفروض يروح يمشي على الريد كاربت ومارحش من أصله.

سيبنا المهرجان ومسكنا فى تفاصيل مالهاش معنى ومحدش اتكلم ـ إلا من رحم ربي ـ عن أفلام المهرجان، ما تحمله من قيمة ومعنى، ما ترصده عن الناس التانيين اللي فى البلاد التانيين ومنعرفش عنهم حاجة وربما نعرفهم من أفلامهم، عن اللي ممكن نكسبه من الفرجة من متعة ودهشة، عن اللي ممكن نخرج بيه من فيلم ويغير فينا وفي بيئتنا ومجمعتنا، عن اللي ممكن يغير وجهة نظرنا فى حاجة أو يضيف لنا حاجة أو محتاجة.

ولو عايز الحق .. أنا لم أفاجئ بكل ده ولا بأكتر منه، تسألني ليه؟ فأقولك لأننا يا عزيزي بقينا أسرى لثقافة اللقطة، مش مهم الحدث إيه أو فين أو مين اللي بيحضره، المهم اللقطة والصورة اللي هتطلع تريند، وتخلي الناس يتكلموا عنها أيام وليالي بدل العوضي ورمضان. 

ومش مهم الناس اللي تجاوزت أزمة «أفلام المهرجانات»، اللى كانت بعبع، أول ما حد يسمعها يقولك يا عم ده فيلم مهرجانات هروح أشوفه ليه؟.. تسأله «يعني إيه فيلم مهرجانات؟» فيرد عليك بثقة اللي ربك مديله جهل غانيه عن كل العلم ويقول «يعني محدش بيفهمه».

مش مهم كل ده، المهم التريند واللي قاعدين فيه مربعين في انتظار التريند الجديد.

تم نسخ الرابط