مفاجأة.. محمد سامي ممثل لأول مرة فى مسلسل 8 حلقات والعرض على إحدى المنصات
شارك محمد سامي في رمضان الماضي بمسلسلين من إخراجه، هما سيد الناس بطولة عمرو سعد، وإش إش بطولة زوجته مي عمر، وعلم خبر أبيض أن محمد سامي سيخوض تجربة التمثيل لأول مرة بمسلسل مكون من 8 حلقات، ومن المقرر عرضه على إحدى المنصات.
اعتزال محمد سامي
وفي مارس الماضي، أعلن محمد سامي اعتزاله إخراج الدراما التلفزيونية نهائيًا، ليفاجئ جمهوره مؤخرًا بقرار عودته بمسلسل جديد سيكون الأهم والأكثر جدلًا في مسيرته بحسب وصفه.
وكتب محمد سامي حينها عبر حساباته على فيسبوك وانستجرام : وداعا الدراما التلفزيونية، السنه دي كانت آخر أعمالي التلفزيونية، واللي فيها بودع المسلسلات، رحلة طويلة حوالي 15 سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير ومع شركات وقنوات كلها مهمة، وكان دايما الجمهور بيشجعني، سواء بردود الأفعال أو بتصويته ليا في الجوائز، وأي نجاح حققته كان بفضل ربنا والجمهور.
وتابع : يمكن المقربين ليا عارفين إني واخد القرار ده من فترة وهو إعتزال الإخراج التلفزيوني ولكن كنت بنتهي من إلتزامات موقعة مع شركات و نجوم والحمد لله إنتهيت منها وكان أخرها 2025، معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي ومن الوقوع في فخ التكرار ودائرة المتوقع والملل، والوحيد القادر علي الدوام هو الله وحده.
مسلسل جديد لـ محمد سامي
وأعلن محمد سامي مؤخرًا عودته، وكتب عبر صفحته على فيسبوك : رد كليتي للمخرج محمد سامى، بسم الله، بكتب مسلسل جديد، سيكون بأمر الله الأهم في مسيرتي الفنية والأعلي مشاهدة وجدل، حكاية جديدة لم يتم تناولها من قبل في أي عمل فني سواء عالمي أو محلي، هصور إمتي ومين الأبطال وهينزل إمتى، كل ده معرفهوش لسه ولا فبالي.
وتابع : كل اللي أعرفه أنه سيكون أرقي وأميز أعمالي وسيكون عمل يحترمه ويقدره كل بيت عربي، إدعولي يخلص بنفس القوة اللي بدأ معايا بيها، واللي مفرحني في العمل ده، إني كنت بحاول ألاقي معادلة صعبة جدًا بالنسبالى وهي إزاي العمل الجماهيري النهاردة بمتطلبات السوق يكون فني بحت زي أعمال كتير إتقدمت زمان من أساتذتنا وإزاي أقدر أخد موضوع يهم المجتمع لقوة الجذب اللي إعتادها الجمهور العربي مني وماتبقاش مشاهداته محدودة أو نخبوي مع إحترامي لمحبي الأعمال النخبوية.
واختتم : إزاي أغير تماما عن كل حاجة قدمتها وأعمل بنصيحة الأستاذ طارق الشناوي وهي التغيير قبل تشبع الجمهور، والحمد لله لقيت ده في مشروعي الجديد، الله الموفق ويكمل إن شاء الله على خير.
