حازم إيهاب: جيلنا متميز وميفرقش حاجة عن جيل السقا وعز وهنيدي
انتهى مؤخرًا عرض حكاية هند من مسلسل ما تراة ليس كما يبدو، بطولة ليلى زاهر وحازم إيهاب، والتي حققت نجاحًا كبيرًا مع الجمهور، وجسد خلالها حازم شخصية يوسف طبيب الأسنان.
حديث حازم إيهاب عن حكاية هند
وقال حازم إيهاب في تصريح خاص لـ خبر أبيض : إسم المسلسل ما تراه ليس كما يبدو شدني من أول مرة سمعته، حسيت إنه محتاج تفسير أكتر من مرة وده خلاني أنجذب له، لأنه بيعكس إن الحكايات وراها تفاصيل وأسرار مش باينة للناس.
وأضاف : عندي قرايب وأصحاب دكاترة أسنان ساعدوني في تقديم شخصية يوسف، وتابعت شغلهم وكلمت بعضهم علشان أفهم تفاصيل أكتر، لكن شخصية يوسف نفسها كانت محتاجة مذاكرة تقيلة ومجهود كبير مع المخرج خالد سعيد والمؤلفة هند عبد الله علشان أطلعها بالشكل اللي الناس شافته.
وتابع حازم : كنت قلقان من رد الفعل، لأن الجمهور بيتفرج بقلبه قبل عقله، وده ممكن يخليه يكره الممثل من غير ما يفصله عن الشخصية، لكن لما عرفت إن القصة حقيقية قررت أتجاوز خوفي وأركز في تقديم يوسف صح.
كواليس التصوير
وعن كواليس التصوير مع ليلى زاهر، قال : الكواليس كانت ممتعة، كنا دايمًا نضحك ونهزر، بس في البداية ليلى مكنتش طايقاني لأني كنت بستفزها في المشاهد، وده كان بيضحكنا في الآخر لأنها كانت متقمصة الدور جدًا.
أما عن المنافسة بينه وبين باقي الشباب، أكد: كل واحد فينا متميز في مجاله، والمنافسة بينا صحية ودي اللي بتخلينا نرفع المستوى، زي اللي حصل قبل كده مع السقا، كريم عبد العزيز، عز، هنيدي وحلمي، المنافسة دي هي اللي صنعت جيل قوي، وده اللي بيحصل معانا دلوقتي.
واختتم : فكرة إن المسلسل معتمد على الشباب ده خلاني متحمس أكتر، حلو إن المنتجين يثقوا في الشباب بالشكل ده، التجربة دي بتدي صورة لقد إيه إحنا ممكن نقدم دراما قوية في المستقبل، وكمان بتدي فرصة لنجوم شباب تانيين يظهروا ويثبتوا نفسهم.
أبطال حكاية هند
وتضم قائمة أبطال حكاية هند كل من : ليلى أحمد زاهر، حازم إيهاب، هاجر الشرنوبي، مؤمن نور، ياسمين رحمي، حنان سليمان، عزت زين، ومن إخراج خالد سعيد.
حكايات ما تراه ليس كما يبدو
مسلسل ما تراه ليس كما يبدو، من إنتاج كريم أبو ذكرى، ومكون من 35 حلقة، مقسمة على 7 حكايات، كل حكاية منها من 5 حلقات فقط، والحكايات هي : فلاش باك، بتوقيت 2028، Just you، هند، ديجافو، نور مكسور، الوكيل
