ريهام عبدالغفور عن رحيل تيمور تيمور : كنت فاكرة إن عمري ما حتوجع تاني بس فراقك وجعني أوي
نعت ريهام عبدالغفور، مدير التصوير تيمور تيمور، الذي رحل عن عالمنا إثر تعرضه للغرق خلال محاولته إنقاذ نجله من الغرق بأحد شواطئ الساحل الشمالي.
فراقك وجعني أوي
وكتبت ريهام على فيس بوك: يا حبيب قلبي يا تيمور ياللي أهل بيتك بيقولوا عليك كنت حنين وفرقوش وطيب وبتحب اوي جبر الخواطر، ياللي أهل مراتك بيقولوا عليك لما دخلت حياتهم جبتلهم الأمان والسلام، ياللي امك بتقول عليك كنت بني ادم حنين وكويس اوي وابن بار، ياللي زمايلك وأصحابك بيقول عليك كنت مسهل عليهم حياتهم، ياللي كنت بتفطر كل يوم مع العمال في طبق واحد في اللوكيشن، ياللي مخلص لشغلك، ياللي ضحيت بحياتك عشان تنقذ ابنك، ياللي قعدت تسمعني وانا بقولك اني قلبي انكسر على ابويا وتطبطب عليا.
واختتمت: كنت فاكره إن عمري ما حتوجع تاني بس فراقك وجعني أوي أوي أوي ووجع كل حد عرفك، كل الناس بتحبك وبتدعيلك وعمرها ما حتنساك، عشان انت سبت أثر وحكايه حلوة عند أي حد عرفك، ربنا يسعدك في الجنة ويجعلك في اعلي درجاتها، ويجمعنا بيك وبالغالين في الجنة يارب.. أسألكم الفاتحة والدعاء.
ونعى عدد كبير من نجوم الفن، مدير التصوير، تيمور تيمور، الذي رحل عن عالمنا خلال الساعات الأخيرة.
أحمد حلمي
حيث شارك أحمد حلمي، صورة لـ تيمور تيمور، وكتب عبر صفحته على انستجرام : إِنا لله وَإِنا إِليه راجعون، ادعوا له بالرحمة والمغفرة.
أحمد السقا
فيما نعاه أحمد السقا بكلمات مؤثرة، وكتب على فيسبوك : هتوحشنى يا صاحبى، هتوحشنى يا أطيب خلق الله، ربنا يرحمك ويغفرلك يا تيمور ويصبر أهلك ويصبرنا، إنا لله وإنا إليه راجعون، برجاء قراءة الفاتحة والدعاء.
ياسر جلال
وكتب ياسر جلال : إنا لله وإنا إليه راجعون تلقيت من قليل خبر وفاة أخى وصديقى العزيز الفنان الكبير تيمور تيمور، رحمه الله رحمة واسعه وأسكنه فسيح جناته وألهم أهله وألهمنا جميعا الصبر والسلوان.
محمد رمضان
أما محمد رمضان فقد شارك صورة لمدير التصوير تيمور تيمور، عبر خاصية ستوري على انستجرام، وكتب : إنا لله وإنا إليه راجعون، ربنا يرحمه ويصبر أهله وأحبابه، ويسكنه فسيح جناته.
