مصطفى حسني يعلن بدء عرض برنامجه الجديد نور أول سبتمبر على ON
كشف مصطفى حسني تفاصيل برنامجه الجديد نور، المقرر عرضه على شاشة ON خلال الأيام المقبلة.
وكتب مصطفى عبر حسابه بفيس بوك: كان حلم كبير أوي عليَّ إن ربنا يكرمني ويسمح لي بالحديث عنك يا سيدنا محمد، من سنين طويلة وأنا بتمنى أعمل برنامج عن قصة حياة حضرتك، أحكيها وأعبر عن كل الحب اللي اتعلمته في رحلتي.
وتابع: اللي شوفته في عيون المحبين لك وهم بيزوروك في المسجد، وفي ألسنة اللي يعرفوك وهم بينتهزوا فرصة ويتكلموا عنك في كل مجالسهم، وفي دموع العاشقين لك لما سيرتك بتيجي قدامهم ومايعرفوش يمسكوا دموع الشوق والحب.
وأضاف: سنين طويلة وأنا بسمع وأقرأ عنك وأدعي بقلبي إني في يوم أنقل كل اللي سمعته واتعلمته لأبناء جيلي، أنقله بطريقة تعلق القلوب بحبك وتعرَّف العقول على جمال أفعالك، حضرتك طيب يا سيدنا محمد وحنين وقوي ومتقن ومبادر وصبور وأتقى من عرف الله، نفسي الناس كلها تشوفك كده.
واستكمل: لكن يا سيدنا محمد اللي نفسي يوصل للناس في حكايتك، قد إيه أنت بتحبنا بصدق ورحمة، وقد إيه إحنا دايمًا على بالك، وأنت عايش في الدنيا وأنت في قبرك الشريف، ويوم القيامة لما نقابلك ونلاقيك واقف طول يوم القيامة تتكلم مع ربنا عننا، وتستسمحه لكل واحد فينا وماتستريحش في بيتك في الجنة إلا وكلنا حواليك وفي حضنك، نفسي كل الناس تعرف ده عنك، نفسي الناس تشوف نورك يا نور.
وعن مواعيد عرض البرنامج، اختتم : تابعوا برنامج نور كل يوم جمعة على قناة أون الساعة 7 مساءً ابتداءً من الجمعة 1 سبتمبر، نحكي فيه سيرة سيدنا النبي مع بعض.
