لبلبة باكية : بشكر مصر اللي اتربيت من خيرها وحققت حلم والدتي بتكريمي في مهرجان القاهرة السينمائي

كُرمت لبلبة منذ قليل بجائزة الهرم الذهبي لإنجاز العمر خلال حفل افتتاح مهرجان القاهرة السينمائي بدورته الـ 44، وسلمها الجائزة حسين فهمي رئيس المهرجان.

وبكت لبلبة خلال لحظة تكريمها على المسرح، ووجهت الشكر لمصر قائلة : بشكر بلدي مصر اللي اتربيت من خيرها ووزيرة الثقافة وحسين فهمي وكل اللي اشتغلت معاهم واهدى لهم هذا التكريم.

وتابعت : دايمًَا لما ببص في الكواليس كنت بلاقي والدتي بتشجعني، ولما كانوا يعلنوا عن مهرجان القاهرة، كانت تقولي هتتكرمي المرة دي لإنك أكثر واحدة اشتغلتي، ولكن ميحصلش نصيب ومتكرمش، ولكن دلوقتي أنا بحققلها أمنيتها رغم إنها مش موجودة وأنا بتكرم النهارده.

ويتزامن موعد تكريمها من المهرجان مع موعد عيد ميلادها، وروت لبلبة تفاصيل يوم ولادتها في السينما قائلة : والدتي كانت حامل فيّ، وكانت بتتفرج على فيلم وجالها وجع الولادة في السينما ولو مكانوش لحقوها ودخلت المستشفى، كنت هتولد في السينما.

واحتفل الحاضرون بعيد ميلاد لبلبة على المسرح وغنى لها الجميع، مما دفعها للبكاء والتأثر الشديد، وشكرت الجميع في نهاية الحفل.

وحرص عدد كبير من النجوم على التواجد في الدورة الـ 44 من المهرجان أبرزهم : محمود حميدة، شريف منير، إيناس الدغيدي، إلهام شاهين، وفاء عامر، هبة مجدي، نضال الشافعي، كارولين عزمي، رنا رئيس، هدى الإتربي، إنجي وجدان، مصطفى فهمي، ليلى علوي، لبلبة، وغيرهم.