الكاوتش اتفرتك .. نجاة داليا البحيري من حادث سير في الساحل الشمالي
كشفت داليا البحيري كواليس نجاتها من حادث سير فى الساحل الشمالي، وقالت داليا فى منشور على إنستجرام : الحمد لله على كل شيء طبعا، لأننا لازم نحمد ربنا على كل حاجة وفي كل وقت، اللي يعرفوني كويس هيعرفوا أني من محبي شهر الصيف جدا، بحب البحر والشمس والسمار ولمة العيلة وكل حاجة في الصيف جميلة حتي فاكهته، بس الحقيقة السنة دي كانت من أسوء الصيفيات اللي عدت عليا في الساحل، يتخللها بعض اللمحات الجميلة مع العيلة وبعض الأيام الطيبة، للأسف كنت مضغوطة جدا، كنت بعزل من بيت لبيت، ودي كانت حاجة مفاجأة مش مترتب لها عشان كده كنت مشدودة.
أزمات متتالية
وواصلت: مناعتي وقعت وبقالي 3 أسابيع عيانة جدًا، جالي دور برد أو كورونا أو زي ما تحبوا تسموه، ولما ابتديت أخف شوية، حسن جوزي اتعدى وتعب جدًا! أكتر مني بكتير، لدرجة إننا اضطرينا نروح مستشفى! وقعدنا 4 ساعات هناك في الديب فريزر، تكييف عالي جدًا جدًا لدرجة إننا كنا موجوعين من البرد.
وأضافت : رجعنا من المستشفى وبعد أقل من ساعة، كانت حرارتي طلعت تاني ورقدت، ومن يومها وأنا مش بتحسن ويكتمل السيزون برجوعي سايقة من الساحل وأنا تعبانة، لأني كان عندي ارتباط مهم في القاهرة، والكاوتش بتاع عربيتي يتفرتك ويطلع دخان، بحمد ربنا إنه كان عند دخلة البوابات وماكنتش ماشية بسرعة، ده ستر ربنا الجميل، باختصار، كان صيف مشحون جدًا، بس برضو هافضل أحب الصيف وأفضله، دعواتكم بقى إني أخف لأني استويت.
أسرار فى حياة داليا البحيري
وسبق وكشفت داليا البحيري أسرار في بدايتها وحياتها قبل دخول مجال التمثيل، كما تحدثت عن كواليس تعاونها مع عدد من النجوم الكبار، وذلك خلال لقائها مع هبة الأباصيري، في برنامج الستات مايعرفوش يكدبوا، الذي يُعرض على cbc.
حياة داليا البحيري قبل التمثيل
وقالت داليا : اشتغلت في الإرشاد السياحي لوقت طويل، وكنت بشتغل مرشدة ومذيعة في نفس الوقت، وقبلها كنت صغيرة وأدرس في الجامعة وشاركت في فيديو كليب سمرة وبعيون كحيلة مع علي الحجار.
واختتمت : كنت أعتقد أنني سأصور إعلان وليس فيديو كليب، قبل أن أتفاجأ أنه كليب مع علي الحجار، وحصلت وقتها على أجر 200 جنيه، وخلال عودتي بعد انتهاء التصوير عملت حادثة وصرفت الفلوس كلها في تصليح العربية وكانت فيات 127.
