ياسمين صبري : الأعمال اللي بتتعرض عليا مملة ونفسي أقدم شعبي وأركز حاليًا في السينما
كشفت ياسمين صبري عن طبيعة الأدوار التي تتمنى تقديمها في الفترة المقبلة، ورأي المنتجين فيها بعد مشاركتها في فيلم أبو نسب، المقرر عرضه يوم 21 ديسمبر الجاري.
وقالت ياسمين خلال جلسة حوارية ضمن فعاليات مهرجان البحر الأحمر السينمائي الدولي، بدورته الثالثة، والذي يقام في المملكة العربية السعودية : أكبر شركة إنتاج في الوطن العربي، قالتلي إني خلاص جاهزة للبطولة المطلقة بعد فيلم أبو نسب، ودي حاجة المنتج بيحسها.
وتابعت : أنا ممثلة تلميذة جدًا، والمنتج والمخرج هما اللى يشوفوا ويقرروا، وأنا مش بزق نفسي لحاجة مش في أوانها، ولكن البطولة جت لما حسوا إنها في أوانها.
أما عن الدور الذي تتمنى تقديمه في مشوارها الفني، قالت : الحاجات اللى بتجيلي بتكون شيك، فبتبقى مملة بالنسبالي، نفسي أعمل شعبي، وأتمنى المنتجين يشوفوني في الحتة دي، ولو مشافونيش هعمل شعبي برضو، لإن هدفي الوصول للجمهور الغلابة وهما فوق راسي، وأنا ممثلة شباك تذاكر، وعادة أفلام المهرجانات بتكون مملة وهادية في الإيرادات، ولكن أنا بنت شباك التذاكر والإيرادات، وحاليًا أركز في السينما.
أيضًا تطرقت للحديث عن مشاركتها في مسلسل الأسطورة، وكشفت كواليس اعتذارها في البداية عن العمل، قائلة : اعتذرت عن المسلسل في البداية ومشيت، وده مش سر، وكل الناس اتكلمت عنه وقتها، وقلت لمخرج وبطل العمل لو مش هتلتزموا بالمكتوب في الاسكريبت اللي شاركت في العمل على أساسه، مش هكمل.
وأضافت : أسهل حاجة عندي الاستغناء، وده سلاح قوي ممكن الواحد يعمله في حياته، الحياة مش مستاهلة إن الواحد يقطع نفسه أو يعيش في ضغط، الحياة قصيرة جدًا مهما طولت، والإنسان المفروض يعيش محترم نفسه وعنده راحة نفسية، وتكون رحيم مع نفسك، مش في سبيل دور تتعب نفسك نفسيًا، وتتعامل مع ناس صعبة أو شرسة أو لسانها حاد.
