هنا الزاهد : تامر حسني صاحب الفضل عليّ من بدايتي وردود فعل فيلم بحبك فاقت توقعاتي
كشفت هنا الزاهد عن كواليس العمل مع تامر حسني في فيلمهما الجديد بحبك، والذي طُرح في دور العرض السينمائي خلال الأيام الماضية.
وقالت هنا في مداخلة هاتفية مع برنامج كلاكيت على إذاعة نجوم إف إم : بشكر ربنا على رد الفعل الكبير، وتامر حسني عنده حضور كبير واتخضيت من ردود الأفعال، لأن دي أول مرة يتبعتلي فيديوهات عياط من داخل السينما، وده كان بالنسبة لي فرحة من ربنا، وبشكر تامر وفخورة إني جزء من المشروع ده.
وأضافت : قبل تصوير فيلم بحبك مكانش بينام وكان بيقعد يألف، وكان مهتم أوي بالأداء وإني أظهر بشكل أكبر من سني، وغيرت لون شعري علشان الفيلم، وكمخرج كان بينام في الدوبلاج على مرتبة علشان يخلص الشغل، وأقل حاجة إن الناس تصقف له وتقوله شكرًا على المجهود اللي عمله.
واختتمت حديثها قائلة : كان بيفتح الكاميرا ويقولي هنا أنا مش هقول أكشن، أنت قولي أكشن وابدأي وطلعي كل مشاعرك وقولي كل اللي إنتي عايزاه وبعدين قولي كات، وهو كإنسان قمة في الأخلاق والذوق وبيجبر خاطر الناس اللي بيشتغل معاهم.
