بالفيديو .. محمد الشرنوبي عن فاتن أمل حربي : اتعودنا علي الهجوم وكنت عارف إن دوري هيثير الجدل

يشارك محمد الشرنوبي في بطولة مسلسل فاتن أمل حربي، الذي يعرض حاليًا في الموسم الرمضاني الجاري، بطولة نيللي كريم، وشريف سلامة، وتأليف إبراهيم عيسى، إخراج ماندو العدل، وإنتاج جمال العدل.

كاميرا خبر أبيض التقت مع الشرنوبي للحديث عن كواليس دوره في العمل والهجوم الذي لحق به، وقال : العمل الفني الناجح طبيعي أن يواجه هجوم، وفي ناس كتير بتستسهل وبتحكم على العمل من مشهد واحد بس، وبتبدأ تهاجم المسلسل من غير ما يفهم فكرته إيه، والفن أذواق في كل الأحوال ويختلف عليه الجميع.

وتابع : بعيدًا عن أن مؤلف العمل هو إبراهيم عيسى لكن طبيعي أن فكرة العمل ده تعمل جدل، وكنت عارف من بداية تحضير دوري أن المسلسل هيثير الجدل لما يتعرض، لأن دوري مختلف والعمل كله بيهدف لرسالة معينة وهو الحفاظ على حقوق السيدات، وإننا منخليش حق الست حاجة صعبة أنها تاخدها في المجتمع، سواء حصل جدل أو لا، إحنا قدمنا عمل له قيمة ومبسوطين بيه ومستمتعين جدًا وإحنا بنصوره.

وعن الكوميكس التي أطلقها رواد السوشيال ميديا حول شخصيته، أضاف : بتضحكني جدًا، وأنا روحي حلوة في الحاجات دي، ولما بشوفها كنت ببعتها لصحابي ونقعد نضحك عليها، وكوميك الشيخ الشرنوبي خريج الأزهر بارك أكتر واحد ضحكني، وكمان كوميك أنتي مش محتاجة فتوى أنتي محتاجة رقم تليفوني، وإحنا شعب دمه خفيف جدًا ومش بضايق من الحاجات دي.

شاهد الفيديو التالي …