دينا الشربيني : كان نفسي أخلف 6 أطفال وخايفة أكبر في السن
تحدثت دينا الشربيني عن مخاوفها في الفترة الأخيرة، بالإضافة لانتقادها ذاتها دائمًا وعدم رضاها عن ما تفعله، وذلك خلال حديثها في الجزء الثاني من لقائها مع شيرين عرفة في برنامج أدينا بندردش، الذي يبث على إنستجرام.
وقالت دينا : دايمًا بجري من النكد علشان مش بحب أواجهه، وأنا من النوع اللي بيهاجم نفسه ومش بتبسط بنجاح شغلي ودي حاجة مش حلوة، وتعرضت خلال حياتي لمواقف سيئة من بعض المقربين مني، وتابعت: في ناس قريبين مني اتوجعت منهم ومفرقش معاهم العشرة.
وأضافت : بحس إني وحيدة لما برجع من الشغل وده أسوأ إحساس، وأصبح عندي فوبيا يحصلي مشكلة مقدرش أسيطر عليها، وبخاف من المستقبل جدًا، وبقالي سنتين خايفة من إني أكبر في السن.
وكشفت عن أمنيتها في صغرها قائلةً : في سن ما كنت عايزة أخلف 6 أطفال، خاصة إني اتخطبت وأنا صغيرة جدًا، ولكن الأطفال مسؤولية كبيرة، ودايمًا بقول إن جوزي لازم يكون زي بابا، ولكن عمري ما هلاقي حد زي بابا.
وتابعت : شعرت في فترة ما إني عايشة في ضل راجل، وللأسف دي مش حاجة صح ولو الست سابت نفسها تحت الستارة دي مش هتبقى هي ومش هتحب نفسها.
أما عن القضايا التي تتمنى تبينها، قالت : نفسي أتبنى قضية ضرب الستات مدى حياتي، وفكرة إن حد بيضرب ست دي بتموتني، ومينفعش الست تقبل ده على نفسها، بجانب كمان مرض التوحد النفسي ولازم الناس يكون عندها وعي به.
