حسام حبيب عن والده : هذا الشخص أذانى أكثر من مرة وأمى هى من تولت تربيتى وانتظروا مفاجآت شيرين
نشر حسام حبيب عبر حسابه على موقع إنستجرام مقطع فيديو رد فيه على كل ما أثير من جدل خلال الساعات الماضية، بعد انتشار تسريب منسوب إلى حسين حبيب والد حسام، وهو يتحدث عن محاولات نجله للاستيلاء على أموال زوجته شيرين عبدالوهاب.
وقال حسام فى بداية الفيديو الذى ظهر فيه إلى جانب شيرين : إيه رأيكم فيا وأنا بضحك على شيرين وواخد الكريدت كارد بتاعتها.. إيه رأيكم فينا.. حلوين صح؟
وأضاف موجها حديثه للجمهور : عمري ما عملت فيديو ولا اهتميت إني أرد على أي حاجة اتقالت عني، لأنى أكبر أخلاقيا بكتير من كل ده، وبمناسبة الكلام عن شيرين، فهى عندها شركة بتدير أعمالها وأنا مليش دعوة بيها، وكل اللى فى السوق عارفين الكلام ده كويس، بس اللي حصل إن أقرب الناس لينا هما اللي زاقين ناس على ناس برضه قريبين مننا، الناس دي ليها مصالح إن شيرين تكون منتهكة ومش فاهمة حقوقها ولما جه بني آدم فهم شيرين حقوقها وبقت شيرين هي المسؤولة.
وواصل حسام حديثه ليقول : شيرين أقدم وأنجح مني، وأنا اتجوزتها وهي شيرين عبدالوهاب أنجح واحدة في الوطن العربي ولو حد قالها تعمل إيه يبقى ضيعت تعب السنين اللى فاتت، وأعتقد إن شيرين أكبر من كده، أما بالنسبة لأقرب الناس لينا أنا عارف إن عشان شيرين بقت الحمد لله قادرة تسيطر علي أمورها أكتر وده مموتهم لأنهم مش عارفين يعملوا أى حاجة أكتر من كدة، وده لأنه بالبلدي الحنفية اتقفلت.. أنا وشيرين ربنا اختارنا لبعض ولما اتنين ربنا اختارهم لبعض لا يمكن يفرقهم إنسان مش سوي ومعتقدش إن فيه إنسان عنده علاقة كويسة بربنا يزق حد على حد واللي اتزق عليه من حقه يتكلم عني كدة.
وتابع : الشخص ده مش أول مرة يأذيني وأنا مش همشي ورا موضوع أنه بينكر ولا لأ وصوته ولا مش صوته، الشخص ده مش أول مرة يأذيني وأنا أسف إني بقول الشخص ده لأنه صعب جدا إني أقول الاسم العادي بعد اللي قاله واللي بيعمله، وإحنا لحد دلوقتي بنقول حسبنا الله ونعم الوكيل وده مش معناه ضعف ولو الحاجات دي استمرت أنا قادر أرد عليها وأجيب حقي بالقانون ومش هيفرق معايا درجة قرابته ليا.
كما تحدث حسام عن والدته مؤكدا أنها من وقفت إلى جواره، فيما وجه فى النهاية حديثه إلى جمهور شيرين مشيرا إلى أنها ستعود إلى جمهورها بكثير من المفاجآت خلال الفترة المقبلة.
وكانت شيرين قد علقت بالأمس على التسريب الصوتي، وكتبت على تويتر : عايزة أطمن كل الناس اللي بتحبني إني بخير ومفيش أي خطر علي حياتي، وبالنسبة للي حصل محتاج رد بعدين بس عايزة أقول إن حسام جوزي ده إنسان من أنضف رجال الدنيا محترم ومتربي وبيحبني أكتر من نفسي، وميستاهلش الهجوم اللي حاصل عليه لإنكوا متعرفهوش.
واستكملت : حسام كان جنبي في وقت كنت متكسرة ومتدمرة وهو اللي بنى شخصيتي ورجعلي ثقتي في نفسي، هو بيحبني أنا وبناتي ومن ساعة ما اتجوزني مستفادش ولا عمل لنفسه أي حاجة، وبالنسبة لحماتي هي ربت راجل أخلاقه وشخصيته عظيمة وهي عظيمة.
واختتمت : ادعولي أنا وحسام بالذرية الصالحة ومفيش أي حاجة من الكلام اللي منتشر حسام نضيف وربنا اللي بعتهولي.
